[是日行山] 港島龍脊

港島龍脊

路線: 土地灣 - 龍脊 - 大浪灣 - 石澳

用時: 三個多小時

距離: 9.4 KM

日期: 2014年12月24日

相機: Sony A5100

今日平安夜，所以冇野做，因此去左行山。今次呢條路超級容易，基本上只係好似散下步咁。風景全部集中晒係龍脊果段路，其他路段因為有樹遮住，所以都冇乜野睇。今日天氣都係一般般，能見度都未算係最好，但係龍脊都可以遠望到好多地方，包括赤柱，石澳個Golf 場，將軍澳同東龍州等。

我地係筲箕灣坐小巴去到土地灣果頭開始，行上龍脊，之後再轉落去大浪灣。到左大浪灣，我地就順手睇下個古代石刻，之後就行去石澳總站搭9號巴士出返箕灣。

龍脊眺望

[是日踩單車] 大圍至海下

大圍至海下

路線: 大圍火車站 - 馬鞍山 - 北潭涌 - 海下(來回)

用時: 六小時左右

距離: 68.13 KM

日期: 2014年12月15日

相機: Sony A5100

終於考完試，可以去試下新路線。之前講左好耐話去西貢踩單車，但一直keep著都有assignments 同quiz，拖下拖下十二月先成行。

今次就由大圍踩左去海下，原以為會有靚景，奈何天陰陰，海下最特別嘅野又係晒海底，所以完全冇特別野睇。這條路線前段，即係入北潭涌之前都唔算難，係要特別小心西沙路D貨車，聽到有巴士貨車，如果情況許可，最好都係係讓車處或巴士站畀佢地過先，費事佢爬頭撞到你。去到後段開始有長斜，但都未去到長到絕望的地步，上下上下好快就見到頂。經過兩上兩落，就到左海下。

可能係因為冬天的關係，海下果到都幾寧靜，冇乜人。又因為成日都係陰天，係個海灘仔睇唔到D水天一色嘅景。最特別就係有隻兇悍嘅馬騮搶人野食，所以去到要收好D食物，唔好畀佢地見到。係果到休息左陣就沿路踩返去大圍，咁就又一日啦~

搶左人包薯片嘅馬騮

[是日踩單車] 港島深夜單車遊

港島深夜單車遊

路線: 炮台山 - 山頂 - 赤柱 - 柴灣

用時: 四個多小時

距離: 43.04 KM

日期: 2014年9月8日

相機: HTC ONE

適逄中秋節，有通宵地鐵，所以可以係深夜去踩下港島平日十分多車的路線。今次起點係炮台山道，之後踩去勵德邨，經大坑道、司徒拔道、山頂道同柯士甸山道上到山頂花園。原本以為上到山頂可以睇下有咩景觀，但因為好大霧，咩都睇唔到。

係山頂休息左一陣同葡萄完人地D豪宅之後就出發去赤柱。我地原路落返去，但去到大坑道前嘅回旋處就改行黃泥涌峽道入南區。之後行淺水灣道就好怏到赤柱。去赤柱嘅路除左窄D之外都冇乜特別難嘅地方。途中見到有好多單車人停左係Ferrari個showroom出面影相同聚集，唔知做緊乜。之後，我地踩去大潭都見到好多人踩單車係對面線經過，但就係冇乜人踩去柴灣方向。

到左赤柱影下相，休息下，補給下之後，就一直沿大潭道去柴灣。去到柴灣就坐返地鐵。

山頂花園

[是日踩單車] 昂坪大佛

昂坪大佛

路線: 東涌 - 昂坪大佛 - 東涌

用時: 六小時左右

距離: 38.03 KM

日期: 2014年8月28日

相機: HTC ONE

是日去挑戰踩單車去大佛。今次條路十分辛苦，因為有大量上斜，仲要唔係普通嘅斜，好多斜路都係1:10以上。但我地都冇放棄，抖下又踩下，零推車，慢慢慢慢咁上，最後都去到大佛。

我地係塘尾路果條村果到食個lunch，然後就開始沿東涌道踩去南大嶼山。東涌道呢段路非常非常辛苦，成條斜路都好斜，冇咩地方會係平D，所以中途我地都要停左好多次先上到伯公坳。有辛苦的上斜，就當然有舒服的落斜，一路向下滑，唔洗十五分鐘就到底。之後，我地就沿嶼南路一路踩，每經一個海灘都落去睇一睇，但因為係平日，所以冇咩野睇。

因為嶼南路都算係一條平路，所以好快就去到石壁水塘，亦即係要面對另一條長斜的時候。羌山道雖然冇咁斜，但因為之前踩東涌道都冇左半條命，所以又係覺得超辛苦。之後再踩埋都好斜嘅昂平路就到昂坪。

係昂坪休息完之後就沿昂平路接深屈路落山，又係唔洗幾耐就到底。之後穿過D村路出返去東涌，途中有兩個地方可以睇到飛機，一個係碼頭，一個係亭，我地係呢兩個地方都停左陣。之後踩多陣就去返東涌。

石壁水塘

[是日行山] 大欖涌水塘

大欖涌水塘 (千島湖)

路線: 掃管笏(黃金海岸) - 大棠

用時: 四個小時左右

日期: 2014年8月24日

相機: HTC ONE

今次呢條路線係我的朋友推介。佢話上網見到人話大欖涌水塘係香港嘅千島湖，人地D相又影到好靚，所以我地就決定去見識下。

今次係我行過最難嘅路線，因為大部路都冇係地圖上面標示出黎，要靠反覆研究人地的指示同路線黎慢慢摸索下點行，沿途仲要不斷搵絲帶度 (有部分路段絲帶之間距離都幾遠)，以免行錯路。除左揾路難，路況本身都唔算太好，上山有D位都要手腳並用先上到。

可是，一切困難都係值得，因為個景真係幾靚。除左睇到千島湖，仲可以遠望到大帽山，赤鱲角機場，甚至中環IFC，所以呢條路線我大力推薦!!!

千島湖

[是日踩單車] 大帽山

大帽山

路線: 荃灣 - 大帽山 - 荃灣

用時: 約四小時

距離: 21.79 KM

日期: 2014年8月21日

相機: HTC ONE

是日去踩單車上全港最高山 - 大帽山。我地由荃灣開始，經荃錦公路同大帽山道到山頂。一開始荃錦公路果段路唔算好斜，但因為路窄又多車，所以要小心車同有時要停低畀D巴士或者貨車過先。上完荃錦公路就到全條路我覺得最辛苦嘅路段，即係由大帽山道開端到閘口，呢段路應該係最斜嘅部分。過左閘口，就即係代表山頂不遠矣，我地就繼續努力踩，冇幾耐就到頂。

上到山頂景觀唔算開揚，因為天氣唔算太好，但間唔中係雲同雲之間都可以睇到好遠。我地上到去果時咁啱D解放軍係到打緊籃球。係上面睇下景，睇下人打波同休息下就轆返落山去荃灣坐車走。

天文台雷達

[是日踩單車] 飛鵝山道

飛鵝山道

路線: 沙田坳道 ｰ 札山道 ｰ 飛鵝山道 ｰ 札山道

用時: 接近四小時

距離: 17.97 KM

日期: 2014年8月15日

相機: HTC ONE

是日去踩單車，目標係飛鵝山道。以斜度黎計，飛鵝山道相較沙田坳道算係比較容易，平均斜度低少少。但以我嘅能力，中途都要停幾次回下氣。上到頂嘅風景唔錯，睇到好遠好遠同好多地方，而且可以睇下人地玩遙控滑翔機，都算係一個休息嘅好地點。

呢條路如果唔計斜度嘅話，都算係九龍一條踩單車嘅好路線，因為成條路除左由札山道過去飛鵝山道果條清水灣道之外都冇乜車，所以可以輕鬆D踩，唔洗留意著唔況，而且上到頂之後可以睇到晒成個九龍半島同香港島北，唔係得個踩字，都有景睇下。

九龍群山與飛鵝山道 

[是日行山] 西貢大浪灣

西貢大浪灣

路線: 西灣亭 - 西灣 - 鹹田灣 - 赤徑 - 北潭凹

用時: 五個多小時

距離: 約12公里

日期: 2014年6月1日

相機: HTC ONE

是日行山，目的地係西貢。我地去行有香港後花園之稱的大浪灣。今次嘅終點原本係長咀，但因為我地行得慢，加上又曬，體力所剩無幾，所以去到鹹田灣就開始行去北潭凹，冇去到長咀。

我地係西貢坐綠的去西灣亭。落車之後就跟著大浪灣遠足徑黎行，一開始就會見到萬宜水庫，之後落多陣山就會見到沙灘。沿途D風景都好靚，好多路段都係係海邊，咁啱今日天氣又非常之好，所以可以睇到好遠好遠。如果畀人矇著眼掉你黎呢到，你會以為去左其他國家，因為水天一色，水清沙幼，完全唔似係香港。沿海嘅路段冇乜地方可以遮蔭，所以好曬嘅日子行就要做足防曬同帶夠水。

到左鹹田灣之後就開始進入內陸，見返多D樹，又冇咁曬。一路行呀行，就會到赤徑，呢到有個石灘同洗手間，可以休息下。之後就繼續向目的地北潭凹進發，呢段路要上D斜，但唔會算太難。到左北潭凹就坐返巴士出西貢，食我朋友極力推薦的雞飯。我覺得都幾好食，食完就返歸了。

鹹田灣

[是日行山] 鳳凰山

鳳凰山

路線: 逸東邨 - 石門甲 - 昂平 - 鳳凰山 - 昂平

用時: 三個多小時(起點至山頂)

距離: 6.6公里左右(起點至山頂)

日期: 2014年4月27日

相機: HTC ONE

是次行山去鳳凰山山頂睇日出。今次係我第一次行夜山，在夜空下行山都幾刺激。呢日天氣都幾好，冇乜雲，係行山途中可以用肉眼見到好多星。這些星星是漆黑環境中唯一的景觀。行到昂平之後，就要不斷不斷咁上樓梯，都幾辛苦。幾經艱辛後，就到山頂。但呢個時候都仲係三點，有排都未日出，所以要係山頂吹著風咁等。到大約五點幾，太陽終於出黎，好彩天氣唔錯，所以可以睇到日出。到個太陽出晒之後，我地就即刻落返山去昂平坐巴士出返東涌。

今次我地條路線由東涌逸東邨開始，沿東涌道行到去石門甲，之後經地塘仔郊遊徑到昂平。到左昂平就行鳳凰徑三段上山。睇完日出就行返鳳凰徑三段落昂平，再去市集搭巴士走。

日出

[是日冇得行] 返工日(三)

返工日

今日天氣都唔錯，又係星期五，係理想的足球機日。今日戰績都幾好，大勝對手  負一局。(如果同隊友分開計我都係嬴!!!!!)

大勝

[是日冇得行] 返工日(二)

返工日

今日天氣冇昨日咁好，陽光冇咁多，但都可以叫做好天。可是，我都係要返工。好在我 A team又係足球機大勝，係沉悶的一天中的亮點。

大勝3:1

[是日冇得行] 返工日

返工日

今天天氣雖然非常好，藍天白雲，但因為要返工，所以整天大部分時間都要留在室內，與好天無緣。我只能在午休時間到露台和好天短聚。

[是日行山] 黃大仙 - 馬鞍山(二)

黃大仙 - 馬鞍山(二)

路線: 黃大仙 - 馬鞍山村

用時: 四個小時左右

日期: 2014年2月1日

相機: HTC ONE

是日適逄新年假，天氣又唔錯，所以又去左行山。因為上次行去馬鞍山條路風景都幾靚，所以今次又行多次。路線同上次一樣，都係由黃大仙(近獅子山郊野公園)去到馬鞍山村。

望到西貢同滘西洲

[是日周圍行] 藍田秀茂坪

遊走藍田秀茂坪

是日去藍田拎特區護照，拎完冇野做就周圍行下。行左去藍田公園，最後係秀茂坪坐巴士走。行完發覺原來呢區如果淨係計居住環境是十分良好，有適當的規劃，各個屋苑樓宇密度都唔算太過高，又有大量休憩設施，不會有太過局促的感覺。

往藍田邨的樓梯

[是日行山] 黃大仙 - 馬鞍山

黃大仙 - 馬鞍山

路線: 黃大仙 - 馬鞍山村

用時: 四個多小時

日期: 2014年1月11日

相機: HTC ONE

是日天氣晴朗，所以又去左行下山。今次路線係由黃大仙(近獅子山郊野公園)去到馬鞍山村。呢條路線嘅重點係昂平，果到有個係香港少見嘅大草地，會有人玩滑翔傘，玩遙控飛機同放狗等活動。天氣好的話可以由果到望到去滘西洲。

如果唔想行咁多又去到昂平，可以坐架主要為馬鞍山村服務的小巴(五蚊，唔收八達通)。架小巴可以係新港城坐到，但因為班次好疏同小巴載客唔高，所以想坐就預好啲時間去等。

草原+ 滑翔傘