[是日踩單車] 啟德郵輪碼頭

啟德郵輪碼頭

路線: 黃大仙 - 啟德郵輪碼頭 - 觀塘碼頭 - 油塘 (來回)

用時: 三個半小時左右

距離: 27.32 KM

日期: 2015年1月29日

相機: HTC ONE

是日去踩單車，之前多數踩郊區，咁今次就試下踩市區。今次由黃大仙開始，踩到去油塘，途中經過啟德郵輪碼頭同觀塘碼頭。呢條路除左郵輪碼頭果段之外，其實唔多好踩，因為多車又多燈位，踩幾下就要停，又要睇實四圍D車。下次再踩，我都可能揀凌晨先去踩，少車D安全D。呢到成條路都係平路，所以除左路上交通之外，唔會有咩難度。另外，因為如果第一次踩，應該記熟D街名，因為係九龍灣果頭D路都幾複雜，有好多條路，但有D路有限制，例如唔轉得某個方向或者。我地就係因為記唔熟，所以途中有行錯路，要停車睇下Google Map。

啟德郵輪碼頭係我地第一個checkpoint。我係第一次去啟德郵輪碼頭，對於我黎講，最特別就係係跑道公園裏面有塊係香港市區都少見嘅草地。係郵輪碼頭參觀完後，就去左check point 2 —  觀塘碼頭同個海濱公園。睇完果三個疊起嘅箱，我地就一鼓作氣踩去油塘。鑑於踩完都五點幾差唔多六點，放工會多車，所以我就hea到七點先回程歸家。

啟德郵輪碼頭

[是日行山] 水浪窩 - 慈雲山

水浪窩 - 慈雲山

路線: 水浪窩 - 馬鞍山 - 大金鐘 - 昂平 - 慈雲山

用時: 八個多小時

距離: 大約17.86KM

日期: 2015年1月1日

相機: Sony A5100

新一年，新路線，新挑戰。今年嘅第一日去左行山，由水浪窩行到去慈雲山。今次係我行咁多次山行得最耐嘅一次，行左成八個鐘有多，由朝行到晚，但實際上係唔洗行咁耐，只不過我地驚轆落山，所以落山行得好慢好慢好慢，拖慢左成個進度，淨係落返馬鞍山同大金鐘都用左兩個鐘。

我地係沙田坐299X，去到水浪窩站落車開始行。今次成條路主要都係跟著麥理浩徑第四同第五段行，只係中途走左上馬鞍山同大金鐘。唔計上山，成條路都唔算難行，係上上落落都幾多，有幾多樓梯。至於風景方面，三個字—非常好，沿途可以見到好多地方，包括沙田、馬鞍山、大埔、西貢、九龍和港島等地方，差唔多睇晒半個香港。只不過雖然今日天氣良好，但始終都係有煙霞，影響左能見度，睇得冇咁清。

夕陽