[是日行山] 在屋久島的第三天

在屋久島的第三天

路線: 新高塚小屋 - 宮之浦岳 - 花之江河- 淀川登山口 - 紀元杉

額外行程: 紀元杉 - ヤクスギランド

用時: 約十小時二十三分鐘

額外行程用時: 多過二個半小時

距離: 約13.6公里

額外行程距離: 6公里

日期: 2015年5月18日

相機: Sony A5100 和 HTC ONE

今日就係成個屋久島行程的重點，登上九州最高峰 - 宮之浦岳。今日大風又大雨，兼可以親身體驗到中學地理堂學到每高一千米低六度的知識。好彩最後都成功上到山頂，完成到目標。

登頂了

雖然我地有地蓆墊著，但都係非常硬，而且個睡袋又熱過龍，最慘係間屋好多人鼻鼾聲超級大聲，好似訓係馬路旁邊咁，所以我地個個都訓一陣就扎醒，訓得唔好，所以我地三點幾就起左身，四點幾就出發登頂。

第一展望台，但冇上到去

有啲地方要拉著繩上

今日朝早天氣非常唔好，雨愈落愈大，我地成身都濕晒，連有防水套嘅背包裏面啲野都濕晒。部相機就算入返入背包都濕左，中途陣亡。而且因為愈高愈大風，又愈凍，所以行得非常辛苦。近山頂地方啲風大到吹得郁我，啲雨吹落塊面會痛。

得支樹幹

去到咁高都仲有木板路

奇特的樹

就到了

又係拉繩

平石岩屋

山頂冇咩大樹，所以好大風

最後幾經艱辛，成功上到頂。係果到求其影返張登頂相次後就衝落山。

目的地近在眼前

到頂了

但上到山之後都未可以即刻落山，都仲要係山脊線附近行，經過其他幾座山(唔洗再上頂)，包括翁岳等。所以要係大風大雨兼低溫底下行多二個幾鐘。

投石岩屋

過左幾座山之後就係一路落山，落山D路因為落大雨，所以好似行溪澗咁，係水中行，所以唔洗問都知對鞋晨早入晒水。一路落山途中會經過花之江河，花之江河係一個高層濕地，佢係一個淨係靠落雨唔靠河流都可以維持的濕地(應該係)。但因為我地果時好大霧，所以咩都睇唔到。

冇圖

過左花之江河就好多係落樓梯，一路落一路落就會去到淀川小屋，淀川小屋前面有條橋橫過淀川，果到望條淀川超靚，清澈的河水倒影著綠色的樹，仙境也。

冇圖

係淀川小屋休息左陣就即係衝落山趕搭尾班車，雖然叫尾班車，但係14:50有車，所以時間都唔算充裕。原本時間都係計劃之內，但因為行行下，同行友人腳痛，大幅減速。就算之後，分開兩隊，一隊趕去追巴士先，都係遲左六分鐘。

冇圖

遲左就真係好大問題，因為果到電話都收唔到，人又唔多，的士都call唔到，如果行落山又起碼行多二十公里。好彩係巴士站諗解決方法果時，有旅遊巴經過，司機同我地講由紀元杉行多六公里有電話亭可以打電話call的士，所以我地就因為遲六分鐘多行六公里。

雖然呢六公里都係石屎路兼大部分落斜，唔多崎嶇，但就因為咁全身重量去晒前腳掌，所以行得仲慘過行山路。

電話都有啲霧氣

一落返山就冇雨

呢六公里都係呢啲石屎路

開始見到藍天

見到馬騮

幾經辛苦終於去到ヤクスギランド，果到又係好似白谷雲水峽咁，有啲輕鬆嘅步道行下睇下唔多杉樹同河溪。

呢到有電話洗手間

係果到等下坐陣，架的士就到啦。今次係我第一次係日本坐的士，架的士同香港果啲一樣，係高級啲同貴啲。由果到落山都要大約四千YEN。

第一次坐日本的士

落山就直接去到我地係book左係安房第二間島上民宿，呢間民宿10分要畀9.9分，因為基本上成間屋畀左我地住，有晒洗衣機乾衣機同廚房，又有廳房之分，好大。轉個灣又係巴士站，對面又有Mos Burger，實有野食買到。我地晚餐就去左呢間民宿開嘅餐廳食(應該係)，超豐富，多到食唔晒。

睡房

客廳

浴屋同洗手間

廚房

我食嘅晚餐

同行友人食嘅晚餐

以下係今日行山的詳細步行數據