Bernard's Blog: [是日去旅行] 最傷心的澳洲Adelaide旅行

最傷心的澳洲Adelaide之旅 - 第一天

日期: 2023年12月22日至2023年12月23日

相機: Google Pixel 8 Pro + Sony Xperia 1 II

平時大家去旅行一定係想開心先去，但我今次去澳洲Adelaide旅行，就由頭傷心到尾，冇一分一秒係有開心過。每日都淨係想時間快啲過，可以唔洗孤伶伶一個，快啲返返香港。

Adelaide 火車站

背景:

講到呢到，應該都估到係同感情有關。冇錯，今次一個人去Adelaide 5日，就係想去搵我係澳洲Working Holiday嘅前女朋友，問清楚點解無端端講分手，想知原因，唔想得幾段冇乜內容字，同一個短短嘅video call，就將七年幾嘅感情完結得不明不白。如果可以，更加係想挽回返佢。

結局當然就係完全失敗啦。雖然係叫見到兩次，係知多咗少少，但原因我都係理解唔到。最後去完澳洲，仲令自己更唔開心，傷害更加大。

呢篇文章嚴格上唔係一篇遊記，因為五日我其實冇乜地方去過。只係一篇令我自己抒發情緒嘅日記，想將自己嘅唔開心寫晒出嚟，可以盡快好返。同埋係呢到同另一半想去working holiday 嘅人講，你好大機會失去佢。就算佢一開始畀你有幾多承諾，幾多希望，幾多信心，講埋返嚟就結婚都好，所有野都可以變做幻影，唔再存在。我曾經都覺得自己會係少數成功嘅例子。

第一日上(2023-12-22):

前女朋友係上星期(2023-12-17)突然send messages 嚟話想自己一個，要分手。之後，我就再video call唔到佢，佢亦都唔肯再有咩討論，所以為咗知多啲，就做咗個會令自己後悔嘅決定 - 飛過澳洲揾佢。我第二日好快就買咗機票同book埋酒店，再睇下澳洲入境有咩注意，整埋個eta，星期五一放工就即刻去機場搭飛機。今次因為放工即刻去機場，為左低調啲唔好畀同事知，所以我係backpack 去。屋企人都係我上飛機前一刻我先同佢哋講。

香港去Adelaide一定要轉機，搵到最平同時間最合適就係坐Qantas 飛Melbourne，之後再轉內陸機。連晒所有等飛機，等轉機，等車，總共交通時間差唔多用左一日先去到Adelaide 嘅目的地。講多少少，今次係我第一次衝出亞洲，第一次坐咁耐飛機，好多都係第一次，都算係大鄉理出城。

應該係我第一次坐有電視嘅飛機，但我已經download咗好多劇同電影係Tablet，所以去程冇用佢個電視。

準備起飛

好好彩，旁邊冇人坐，我可以坐得舒服啲。

勁咸嘅零食

第一餐飛機餐，係晚餐。

我揀咗個炒麵，實際係炒米線，我覺得幾好食。

食完仲有雪條一支

有第二餐，係早餐。

我揀咗個西式早餐，呢個就普普通通。

天光，成程機都冇乜點訓過，一黎唔開心啦，二黎就算旁邊空咗都唔係坐得太舒服。

就到Melbourne

跑道旁邊就有好多牛牛，好得意。

降落之後就入境啦，以為自己backpack唔洗等拎行李，又換咗passport可以用自助，可以好快就入到境。點知畀海關的咗出黎問問題，又要拎晒啲野出黎畀佢check。前前後後有三個唔同職員問我唔同問題，問我行李有咩，點解有兩部電話，去搵邊個，有冇佢地址，佢而家有冇返工，問我職業，返工做咩，我會住邊，點解淨係去5日，總之勁多問題。最後用咗唔少時間先入到境。好彩Melbourne機場唔算大，轉機時間又唔太趕，所以成功轉機。

過埋海關，要過另一個Terminal轉機。

第二日下(2023-12-23):

過完海關，就去另一個Terminal等轉機，Melbourne去Adelaide大約係一個鐘機程，唔算太遠。最特別(係我角度)就係內陸機有免費WiFi，可以上到機繼續Message。

一個鐘機都有舊cake同野飲。

仲有粒朱古力，但個Holiday我就唔Happy了。

有水

好快就到咗Adelaide

Adelaide個機場我覺得靚過Melbourne好多，但就好似細啲。

之前一路都有聽前女朋友點坐車，所以我知可以用Google Map直接搵有咩巴士坐。

好似都係第一次坐有兩卡嘅巴士，又係新體驗。

我上得啱巴士線，但我冇留意方向，所以坐錯車。係一個outlet 落車。再search過可以坐咩。今次睇啱方向先上。

架巴士可以直達前女朋友屋企附近，再行啲路就到。

澳洲啲雀同香港唔同。我好鐘意留意呢啲。

去到佢屋企，以為可以見到佢啦，點知原來佢唔係屋企。係去澳洲之前，佢係唔知我搵佢，因為知左，以佢性格應該會避開我。而且我都聯絡唔到佢，去到佢屋企門口，都係要佢媽媽(好多謝佢支持我，幫我手)幫手同佢講聲。之後幾日得知，佢原來聖誕節 or 之前開始都唔係屋企，去咗佢澳洲朋友屋企住(男定女，有幾多個我就唔知啦)，出去Gathering，出去玩。我知道之後勁傷心，都係分咗手一星期姐，我好似已經被忘記得七七八八咁，可以有心情同人玩，而我就好蠢咁過黎澳洲搵佢，睇下有冇機會挽回，仲要畀佢話我咁樣過黎搵佢佢好不安。

咁之後佢肯Message我，話聽日約我去Cafe，聽日先見我。咁我唯有去酒店Check-in等第二日。係去酒店之前，因為知出去食野貴，一個人勁傷心都冇心情去餐廳食，就去咗超級市場買啲包，買奶當係晚餐。