[是日去旅行] 最傷心的澳洲Adelaide旅行 - 第五天

 最傷心的澳洲Adelaide之旅 - 第五天

日期: 2023年12月26日

相機: Google Pixel 8 Pro + Sony Xperia 1 II

今日最後一日，終於可以走，成晚冇訓過，差唔多夠鐘就沖個涼，再執下野，就出發去機場。走果時天都未光，條街都冇乜人，一路個心都諗，都最後一日，最後一次，佢會唔會嚟送我呢。由落酒店樓下，直到機場，我都有週圍望，希望見到佢身影，但就算去到最後，係Terminal 坐到最後一分鐘，我嘅幻想都冇成真。我最後試下video call佢一次，希望見到一面，佢都冇聽到，只係畀左兩個字我 - safe flight，就再冇然後了。咁就唯有死心，準備過安檢，搭飛機返香港啦。

天都未光

天都未光就出發去機場，間房係幾舒服

去到樓下，會唔會見到佢等我呢? 唔會

跟Google Map 行去個巴士站

行過另一條街，會唔會見到佢呢? 唔會

就到巴士站，佢會唔會搵緊我呢? 唔會

到巴士站，確定冇錯方向，佢會唔會等緊我呢? 唔會

去到機場，佢會唔會係機場送我呢? 唔會

最後一個機會，坐係到等多陣，可能佢遲到呢，佢會唔會送我走呢? 最後都係唔會 

唯有死心，最後都係自己一個走，個世界靜咗。

都係坐737

上機，離開傷心地Adelaide

呢兩個Tart係我咁多日係澳洲食過最好食嘅野。睇個盒，係一間叫Ivans Pie嘅舗整。

到Melbourne

準備離開澳洲

係機場冇野做，諗著用晒啲Cash買手信，但大部分野香港都有，最後買咗Emu oil。

上機準備飛返香港

旁邊又係冇人坐，係我好彩定點

超飛離開澳洲

第一餐Lunch揀咗黑椒牛肉飯，味道一般。

雪條

澳洲特產TimTam

到第二餐，有個Brownie

我揀咗炒飯，我就覺得幾好食

終於返到香港

成個旅程，可能會有人話我係自作自受，人地都同你講咗分手，你仲做乜走去搵人？我知自己好傻好蠢，但我果時仲好愛佢，好想知清楚發生咩事。點解兩星期前先話我係最重要嘅人，返到嚟會好照顧我，但轉個頭就話分手，好想知點解。我係好後悔去咗澳洲，因為冇一個實際答案之如，亦知佢分咗手之後都冇話好唔開心，仲有心情去同朋友gathering ，同朋友玩。到頭嚟，原來只有我一個人唔開心，究竟一路以來，佢對我有幾真心？佢同我講嘅野係咪有好大話？我多咗好多問號。

由一開始佢話去working holiday ，我唔支持佢去。到我讓步，希望畀佢完夢，體驗外國生活，學好英文，支持佢去，為佢準備好多，擔心好多。到最後，只係兩個月時間，就換嚟一句分手。我返到香港之後，佢就慢慢block晒我所有野，人間蒸發咗。只係短短兩三個星期，就由最親密嘅人變做陌路人，真係好難接受。感覺就係，我好似只係一個香港限定陪伴佢嘅人，到佢到澳洲有新圈子，就好無情咁掉低我。七年幾嘅感情同時間，簡簡單單就完結咗。

直到今日，一個幾月後，我都仲係好唔開心，冇咗開心，有希望嗰種感覺。一靜落嚟，成日會有呢次去［旅行］嘅回憶同感受，未完全放低到佢，仲未可以正常返。現階段淨係接受咗現實，就係佢唔會再返嚟我身邊。每日睇YouTube ，學下人點諗。每日返工，上下亂報嘅興趣班，同friends 食飯，吹下水，等自己少啲時間亂諗。除此之外，我都唔知點可以令自己好啲，開心啲。好多人講時間慢慢過，就會慢慢好返，我都唔知自己要幾多時間，未見到終點，真係好唔開心。

係今次呢件事，我學到就算你幾愛另一半，對佢幾好，付出有幾多，只要佢思想唔同你同步，佢唔夠愛你，唔願意認真溝通，所有野都係白費，冇人會多謝你，更加唔會因為你傷心難受而可憐你關心你。只有你自己先唔會背叛自己，永遠只有自己係最信得過。雖然我了解到呢到道理，但呢一刻都仲未完全擺脫到負面嘅情緒。

寫咗好多，一路寫當然有喊，但寫完好似放低咗啲野，輕咗。嚟緊二月尾三月頭，會去第三次單車旅行，由東京踩去名古屋，雖然都係獨遊，但帶著散心嘅心，應該唔會好似今次咁難受。唔知去完心情會唔會再好啲呢？有心情應該又會update下個blog。

希望係不久嘅將來，我睇返呢個遊記，可以真心笑自己當年有幾蠢，呢次［旅程］所造成嘅心理傷害可以好返，可以真係開開心心咁過每一日，唔再因為呢個人而唔開心。