日本太平洋岸自転車道 - 準備篇
今次係自從上次去四國環島之後，第三次去日本踩單車，距離上次出國踩單車都有差唔多六年時間。路線係由成田機場出發，踩到去名古屋。除咗由伊良湖去名古屋，同部分路段想省返啲時間，大部分都係沿著太平洋岸自転車道嚟踩。
呢條單車線，喺一兩年前已經睇到，但因為疫情同當時嘅女朋友關係，一直都實行唔到。到咗今年，因為可以請到假同想散下心，就係一月決定二月尾三月頭帶埋架單車去踩一部分太平洋岸自転車道。
雖然上次四國環島都已經六年前，但上次嘅經驗對今次嘅行程計劃好重要，知道有咩要帶，有咩要買過，每日嘅合理路程計算，所以今次總體嚟講係輕鬆過上次好多。
路線
太平洋岸自転車道個起點係由千葉縣去到和歌山縣，有1487KM。今次我有十三日假，除非日日百幾二百公里，我應該冇可能一次踩得晒，所以我今次淨係踩咗一部分，而且都skip咗伊豆半島。十三日入面，我有十日有踩單車，平均每日大約八十公里，移動速度目標係20km/h，盡量係天黑前到達目的地，咁就可以有時間係目的地行下，係酒店hea下，唔會變咗日日淨係踩單車。咁多日淨係得一日因為爆tire 加落雨先要踩到差唔到六點，其他日子都可以係四點左右或更早到達目的地。
https://www.kkr.mlit.go.jp/road/pcr/index.html
航空公司
因為太平洋岸自転車道個起點係千葉銚子，所以我會飛去成田機場，可以近啲個起點。買機票我都係睇價錢同時間，今次揀咗香港航空，有凌晨機飛去成田，第一日可以有多啲時間砌返架單車同寄啲行李去最後一間酒店。香港航空單車寄倉要收每程80美金，要係機場係佢部iPad用信用卡畀錢，所以來回加埋都要千幾蚊。
日本行李託運
因為今次起點同終點，唔係係同一個地方，所以我就要將我唔係行程中需要嘅行李寄去最後一間酒店。因為驚個單車箱摺埋都好大，好難揾到地方寄，所以一早上網揾定有咩delivery service 接受大型行李。最後揾到JAL ABC可以寄三邊加埋有260cm嘅行李，而JAL ABC淨係係機場有counter ，所以我成個行程就set咗由成田機場出發。
https://www.jalabc.com/en/hands-freetravel/airport-baggage-delivery.html
最後一間酒店
成個行程最重要嘅一間酒店，因為佢要幫你收行李。我今次book 名古屋ＪＲゲートタワーホテル做我最後一間酒店。我揀最後一間酒店嘅條件有二個。第一，近JR 站，呢間係正名古屋站上面，我最後一日走就唔洗推著兩件行李行勁遠。第二，唔係太細嘅酒店，因為我啲行李都好大下，又要十幾日後先到，太細驚酒店唔肯幫我收。
我預先用email 問咗間酒店肯唔肯收，我先book。但我都計漏咗一樣，就係呢間酒店個lobby唔係地下，亦都冇獨立lift上到lobby。我拎到架單車上去，reception 先話成幢大廈唔畀推單車，所以下次book，要check埋酒店有冇地下門口。
裝備
貨架
今次用返上次個tailfin貨架，夠輕，又可以好簡單咁裝係road bike。
單車箱
上次用嗰個單車淨係後面有兩個碌，變咗一重，就拉得好辛苦，同埋又要拆handle bar，所以今次用Scicone Aerocomfort 3.0 Road Bike Travel Bag，好推好多，裝拆都方便好多。
維修工具
去得單車旅行都預咗爆tire，而家科技進步，有迷你電pump同TPU內胎，可以唔洗好似上次去四國咁，好辛苦咁用手pump打氣打到天昏地暗。TPU內胎又輕又細好多，今次帶四條，都唔會重同太大舊。
衣著
有上次落大雨嘅經驗，今次係防水裝備準備多咗。今次最有用係之前買嗰件Gore Wear C7 Gore-Tex® Shakedry™ Stretch Jacket，真係完全防水，而且都好防風，最重要係夠輕。今次踩單車有兩日半都落雨，如果冇呢件外套應該凍死咗。可是，今次準備嘅手套同shoe cover，就唔係好掂，唔太防水又唔太耐用，最慘兩樣都唔平。
今次踩單車係二月尾到三月頭，大部分日子都係得幾度至十五度左右。上身就一件base layer，一件厚嘅長袖單車衫，一件厚jacket ，再睇下有冇落雨同大唔大風著埋件Shakedry jacket。下身就一條厚嘅bibtight。腳就保暖襪加shoe cover。
導航
今次導航我主要係用Garmin 840，我喺太平洋岸自転車道個官網download 佢個kml，再用啲online tool 轉做gpx，之後再入落840。因為佢個官網個kml有好多分支路線，有啲又有來回程，搞到convert出嚟個效果唔係咁好，要手動再執執。如果係唔經太平洋岸自転車道，我就直接係Garmin connect 用佢suggest 嘅路線，佢畀嘅路線我覺得可以接受。
沒有留言:
張貼留言