[是日踩單車] 日本太平洋岸自転車道 - 第三日

 

日本太平洋岸自転車道 - 第三日

路線：銚子去御宿

日期：2024年02月24日

距離：103.4KM

酒店：サヤン・テラスHOTEL&RESORT

相機： Google Pixel 8 Pro + Sony Xperia 1 II

經過尋日嘅熱身，第二日就係成個行程唯二會過一百公里嘅日子，但大部分都係平路，所以就算過一百公里都唔會好困難。今日天氣非常好，藍天冇乜雲，係踩單車嘅好日子。

犬吠埼燈塔

一起身打開窗，見到冇落雨，即刻開心晒。落去食個早餐，呢間酒店唔係自助餐，係係四個set揀一種，我就揀咗Omelet set，味道不過不失，但份量對於我就唔係幾夠。

變返好天

四種早餐揀一款

揀咗食Omelet

食完之後就開始踩，今日全部路線都係跟著太平洋岸自転車道踩，加埋我入咗條路線入Garmin，所以都冇行錯路嘅程況。雖然今日好好天，但其實都幾大風下，如果逆風踩，都幾食力下，好彩我大部分時間都係順風。

Full Gear 準備出發

酒店外觀

好好天，但勁大風

第一站就會經過犬吠埼燈塔，但我就冇上個塔，只係係附近睇下風景，影下相。之後繼續踩，好多時就係係個海邊踩好正。有好多海邊路段人影都冇隻，成條路就得我一個，個感覺好舒服。但有啲路可能之前大風大浪，將啲沙吹咗上條路，變咗有啲沙丘，所以要推車過。

去到犬吠埼，一望無際

好靚嘅海景

燈塔

過咗個燈塔要上一個小山丘

我的單車

一堆雀仔係海面休息

另一角度再影

進入海邊單車徑

成條單車徑都唔會見到幾多個人

單車徑上面有太平洋岸自転車道logo

空空如也

如果見到人都係滑浪人士

踩到有啲肚餓，又係google map睇下會經過咩餐廳，見會經過一間蕎麥麵店，就入去食lunch。呢餐味道我就覺得普通，同埋唔多夠飽，所以踩多陣就去便利店買飯糰食。之後咁多日，我都冇再停低食lunch，而係覺得就肚餓就入便利店買飯糰or三文治食，省到時間之餘，咁樣補充能量會舒服啲。

蕎麥麵店

蕎麥麵

唔夠飽，食多個飯糰

食完繼續踩，又係不斷見到海，真係好靚好舒服。今日最特别就係會經過一段路，旁邊啲唔知梅花定河津櫻開晒花，勁靚。

櫻花?

路邊有一段路都係櫻花

地下有logo 就知冇行錯

其中一段單車徑

又停低影下相

一個海邊公園

進入返多啲人煙嘅地方

橋上面影

經過一個海灘

慢慢踩下踩下，四點多少少就到今日間酒店。呢間酒店冇得拎架單車上房，亦都冇得放入酒店入面，只可以放係正門旁嘅泊車位，我用一條單車鎖加祈禱，希望冇人偷。酒店房個view好靚，前面就係沙灘，個feel好似沖繩。入房settle好，又係拎啲單車衫去洗，之後就係休息下等食dinner 。

到酒店

架單車淨係可以放係酒店門口

房可以直接望到海

房外望

今餐dinner 好有特色，好精致，味道都ok，但完全唔飽，唔適合做完運動食，所以踩單車去附近便利店買啲野食頂肚。

是日晚餐內容

主菜 - 牛肉

主菜 - 魚

唔夠飽，再買啲野食

食完，前面有個大沙灘，當然係落去行下，影下星星，試下Pixel係咪真係影到星空。可能月亮太光，又有啲雲，所以影出嚟冇乜美感。

試用Pixel影星星

唔係幾影到星星

好光嘅月亮

臨訓前再去睇下架單車有冇畀人偷咗，之後就返房準備休息。

望下安心啲