[是日踩單車] 日本太平洋岸自転車道 - 第六日

 

日本太平洋岸自転車道 - 第六日

路線：藤沢去宇佐美

日期：2024年02月27日

距離：77.3KM

酒店：民宿ふかべ

相機： Google Pixel 8 Pro + Sony Xperia 1 II

今日算係休息日，準備聽日爬山，所以路程都唔算長。是日重點係影到好靚嘅富士山，我覺得可以做參賽作品。晚餐係另一餐海鮮餐，係我期待嘅其中一餐，亦都冇令我失望。

通往富士山之路

起身第一件事，睇下天氣，今日又係好好天，非常之好。之後就落去食個早餐，味道不錯，係啲炒麵有啲油。

第一round

第二round

食完早餐，裝個身，就出發。一開始就由藤沢踩去江之島嗰邊，入返去單車徑。見到都有唔少人踩單車入去江之島，但我諗咗諗，都係算，下次再去。

好好天，出發

過江之島而不入

又見到富士山

今日成條路線有一半以上時間可以望到富士山，有唔同角度，唔同景色。踩到一條行人天橋嗰時，心諗，係呢個view啦，可以影到好靚嘅富士山。咁就停車，行上去影，我覺得我都影得唔錯，影到全個旅程最靚嗰幾張相。

上天橋影富士山

富士山(1)

富士山(2)

富士山(3)

富士山(4)

係會畀人推介嘅隱世影富士山地點

之後都係跟著單車徑，大部分時間都見到海，見到個景靚就停低影下相。因為今日時間唔趕，可以慢慢踩。去熱海係雙線雙程行車，中途又塞車，所以如果條路太窄又冇行人路，就要同啲車一齊慢行，好彩慢踩路段唔算長。

到湘南大橋，又係另一個位影富士山

富士山

大磯港

獨立單車徑

有個牌就知冇行錯

又見到富士山

停低食下野

一路沿著海邊踩

My bike

枝豆飯團幾好食

踩下踩下，就到咗熱海。熱海啲酒店特別高，成個感覺同沿途其他城市唔同。係個海邊公園，又有唔少櫻花(？)開咗，我又係影得好靚！

到熱海

有好多高樓

櫻花(1)

櫻花(2)

櫻花(3)

櫻花(4)

熱海距離今日目的地宇佐美好近，但中間有唔少上落斜，所以都要出少少力，最後三點左右就到民宿。間民宿門口係落斜嘅尾段，我冇留意，所以過咗龍，好彩係另一邊行唔太遠都可以去返門口。

離開熱海

係隧道出黎

單車

隧道入面行人路好闊，好安全

初島，有機會會想去下

到宇佐美，但過咗龍

到民宿

架單車可以泊係民宿樓下個泊車位，又係靠自己把密碼鎖。Check in完，拎晒啲行李上房之後，就即刻去浸下温泉。係check in 嗰時，有對夫婦見我聽唔明日文，個老公識少少普通話，諗著幫下我，但reception 有英文guidelines ，所以最後都唔洗佢幫手。之後係温泉見返，佢同我一齊用大家都唔太好嘅普通話傾咗陣計，好搞笑。

泊係泊車位

普通民宿房間

窗外

冇電梯

去浸溫泉

浸完就返房hea下，休息下，六點就落去食dinner。今餐啲魚生我就覺得冇波左間民宿咁好食，但條金目鯛就大好多，好食啲，條魚大過我手掌。係食飯中途，嗰對夫婦嗰個老公過嚟畀咗啲清酒我試，又叫我又咩唔明可以問佢，好好人。

晚餐

好好人請我飲

亂咁叫咗杯野飲

金目鯛

勁大條

仲有隻貝

要自己po床

我估我整啱

食完之後，天氣好，又出去影下星星。可惜個月亮太光，又影唔得靚。影個月亮，pixel影到個月亮好似日落咁，好奇怪。睇嚟都要研究下pixel 點影先靚。返民宿途中就去便利店買下雪糕同特別飲品。係民宿休息多陣就訓教，準備聽日爬山。

又影到好光

影月亮影到好似日落

買雪糕

新野，又係練奶，即刻買