Bernard's Blog: [是日去旅行] 最傷心的澳洲Adelaide旅行

最傷心的澳洲Adelaide之旅 - 第二天

日期: 2023年12月24日

相機: Google Pixel 8 Pro + Sony Xperia 1 II

上一篇講到，佢今日約咗我去一間cafe見個面，話會講清楚。係今日之前，我都未知佢係去咗人地到住，去咗gathering，所以我留低係佢屋企嗰幾封信，原來佢係未睇到。我去見佢之前以為佢睇咗，知我點諗，所以我都帶著少少希望，盡量用平常心去見佢。

公園入面嘅溫室

因為突然咁去一去澳洲，用咗唔少錢，酒店又包埋早餐，所以我都盡量食飽啲先去見佢，減少支出。

好典型嘅西式早餐

我第一日就差唔多食晒所有種類

最後食多碗Corn Flake

落街就係市中心，條街好靜

成日都見到好多中文字

成個城市以環境規劃嚟講係好舒服，啲路好闊，唔迫

有Tram

行行下見到隻雀，自己一隻係到行，好搞笑。遅啲係另外啲公園會見到佢啲Friends

成個市中心都好闊落

唔多高樓大廈

見到有滑板車，嚟緊幾日就係用佢打發時間

去到cafe，等咗一陣佢先到，好快就有位，佢就叫咗burger，我就淨係飲咗杯latte。一開始大家都好似普通朋友咁講下野，我講下我嚟澳洲見到咩，佢就講下佢有咩做。

係言談之間就知道佢冇返屋企，冇睇到我寫嘅野，佢又話食完野之後有野做，仲一路同我講我可以去邊玩。我表面上都好似冇乜野，但心入面已經完全崩潰。原來我就算山長水遠嚟想見下佢，去揾佢，想知佢諗乜，佢心入面已經得返佢啲澳洲朋友，我已經唔係啲咩一回事。都係講咗分手一星期，我已經唔再重要，連少少關心、陪伴同時間都唔會畀我，仲可以好冷血咁叫我自己去唔同地方玩。咁無他嘅，今日平安夜，又係佢生日，一個絕情嘅人都揀同friend 過，同人gathering ，同人慶祝啦，係咪先？

間餐廳好多人，所以食咗都冇一個鐘就要走。食完大家都有繼續行少少，佢有介紹下條街有咩，我以為佢會陪下我，同我行去Rundle mall，但轉個頭佢就話佢返去係行另一邊，講句bye bye就回頭走咗。我當時仲唔知點解好傻咁追返上去，同佢講句生日快樂。

係呢一刻，真係傷心到都唔知點形容，仲有果種孤零零嘅感覺十分難受。自己一個係異地，冇野可以做到。唉，就算而家過咗個幾月，嗰種感覺仲係好真實。

最後一餐同佢食嘅飯，可惜佢都係唔明我有幾心痛

你幫買嗰部Pixel影相好靚

得返自己一個之後，我諗到可以做嘅野就租架電動滑板車，週圍轉下。我買咗個三日pass，25 AUD，每日有90分鐘limit，算係比較平嘅打發時間方法。

有藍色同橙色，我揀咗橙色

原本約好咗我二月第一個星期就去揾佢，過八週年紀念，所以我都一路有係Google Map望下Adelaide 有咩地方可以去，所以今日就揀咗去植物園行下。個公園係幾靚，有設計過，好多唔同嘅雀仔同植物，仲幾大下。最特别係一開始有個地方有勁多蝙蝠，我都係第一次見咁多蝙蝠係同一個地方。附近仲有個動物園，原本又係約好咗一齊睇樹熊，而家得返我自己一個，所以都冇入去參觀。