四國單車環島 - 第四日
路線: 室戶岬去須崎
日期: 2018年12月04日
距離: 120.32公里
距離: 120.32公里
相機: Sony A5100 + Xperia XA2
今日係第四日踩單車，又係過百公里，但主要都係平路，而且尋日落完雨之後，有部分時間好天，易踩好多。今日成條路線都係圍著太平洋黎踩，大部分路都係貼著海邊，望著個海踩，望到唔想望，係後段先會有少少山路。今日行程最特別唔係個景，係午餐食左個好好食嘅魚生飯，係第一次食呢種魚生飯。
詳細路線
今日主要都係行國道55，之後因為唔會入高知市，所以中間轉入14，最後行23去須崎。中間係有一段路上左單車徑，但單車徑離國道唔遠。全程最麻煩係行14果時有一條橋要過，因為多車，又得兩條行車線，所以推車過去。但行過去都要好小心，因為條路好窄。
以下係治途風景
第二朝起身先見到原來間酒店真係同海好近
去食早餐，份量都係唔多
玻璃樽裝嘅牛奶係最好飲
食完早餐返房，陽光再多啲，個景再靚啲
真係好靚嫁，如果住多日，全日坐係窗邊hea 都幾正
真係好近海邊
陽光照在海面上
睇多陣就落去浴場沖多次涼，去左露天風呂，得自己一個，浸著深層水，望著個藍天，聽著海浪聲，仲有雀仔叫，真係好舒服。
浸完，就上返房執野，準備出發。
酒店個外觀
餐廳就係旁邊
踩幾踩就見到個停車場有好多貓
同我屋企隻貓顏色一樣，但健康唔係太好
到左室戶岬，酒店過去其實一公里多少少，好近
有條步道可以行
介紹室戶岬
有個觀景台
觀景台外望，右邊個建築係民宿黎，應該係最近室戶岬嘅民宿
望出去真係好靚
架單車就咁泊係到
真係好靚，值得一去
左面嘅室戶岬
有條鯨魚尾，應該有啲季節會見到鯨魚
室戶岬
有張木椅
觀景台
觀景台同民宿
再影多幾張相就繼續行程
一大段直路係海邊，一路仲有好多
買左深層水，但味道都係水
一路都係貼著海邊踩，個景同上次去石垣島好似
今日朝早真係好好天，有陽光藍天，踩單車好舒服
一路都有行人路，所以隨時都可以停低影相
藍天藍天
好壯闊嘅海洋
一路都係望著個靚景踩單車
到左道路站，叫大山
又係好靚，如果多啲時間會行過去對面
安芸市嘅觀光景點，有時間慢慢行下呢啲市鎮仔都幾開心
高知縣觀光景點
係到hea多陣，就繼續踩，見到隻鷹
開始多返啲雲
踩下踩下，見到有個食堂，去睇下有咩食。原來食海鮮飯，係魚仔飯，再有剌身。揀左右上角果個。
佢係係個漁港入面
有個魚仔飯，有魚仔湯，有剌身，好好好好食
第一次食呢種飯(可能見識少)
佢有介紹係咩魚，除左聽到有吞拿魚，其他應該係鯛魚同鰹魚，淨低右手邊果款唔知係咩。好新鮮，可能因為好似係每日即捉。
魚仔湯，好清甜
食堂個名，佢個吉祥物好奇怪
仲有杯飲品送，我揀左橙汁
彩色吉祥物
間食堂係二樓，一樓係賣海鮮
成個漁港最旺係間食堂
食完踩兩踩，有條單車徑，即刻上去踩
又係貼著個海
原來有條單車徑連著高知同安芸
條單車徑都幾靚，路又唔會太爛
樹道單車徑
靚就靚，但全程未見過其他單車
有個好長嘅海灘
條單車徑都幾舒服，如果可以係高知租單車，踩兩日一夜去安芸都幾正
又有個觀景台，呢到會見到人影
最佳觀景點
講解見到咩，但天氣開始差，睇唔清楚
個沙灘好長，但冇人，可能因為冬天
又係一望無際的大海
有個平台，可以係到野餐
觀景台個樣
係上果條麻煩橋之前買塊Lawson 雞扒食下
因為好小心咁行過條橋，行左好耐先到另一邊。另一邊係桂浜花海道，又係有單車徑，兩邊種晒花，係一條好長嘅直路。雖然呢邊靚啲，但近海果邊條樓好踩好多，因為唔會有紅綠燈要停。因為過橋花左好多時間，延誤左好多，所以之後都冇影過相。後面段路愈黎愈少人煙，尤其係國道23，大部分路都係沿著個內海灣踩，最後踩過法院山，就到須崎。成日係到諗，住係咁少人嘅地方，每日生活係點過，買野係點買。
今晚住呢間酒店可以放單車入房，間房都唔細，但唔平，可能因為附近冇乜酒店冇競爭
酒店大堂有個單車位
酒店個名
係Google Map search到呢間餐廳去左食
全部日文，但我目標係食須崎名物
有啲定食
飲品Menu
最後叫左須崎名物鍋燒XXXX同壽司Set
其實就係有隻蛋，有啲肉碎嘅麵
叫左個Beer
餐廳個外觀
最後去左Family Mark買左杯雪糕
同塊雞扒做甜品同宵夜
踩左四日架單車仲狀態良好，今日都係早休息，雖然聽日行程短好多
雖然每日踩單車都好累，但可以慢慢睇風景，每日期待食咩午餐，又可以話停就停影下相，踩單車遊歷就係有呢啲好處。
沒有留言:
張貼留言