四國單車環島 - 第六日
路線: 四萬十市去松山市
日期: 2018年12月06日
距離: 158.75公里
距離: 158.75公里
相機: Sony A5100 + Xperia XA2
今日係最長嘅一日，係計劃果時都知今日會好辛苦，實際都真係好辛苦。開頭又落下雨，又轉涼，中間又要上一個勁斜嘅山，本身都唔係踩得快，係咁嘅情況下踩得仲慢，最後連休息踩左成差不多十三個鐘先到。到松山果刻真係喊出黎，終於到啦。今日風景都唔差，開頭逆四萬十川而行，見到幾條沉下橋，見到雲海。後尾又有段路係沿海踩，經過下灘站，但踩得太慢，所以睇唔到日落。因此，今日雖然辛苦，但都好充實。
今日為左盡量少上山，所以都好小心揀路，揀啲平啲。一開始行441，係四萬十川旁邊行，之後轉入381，再行57，接著31，呢條路係上一個好斜嘅山，叫歯長峠，沿途係勁少人同車，其實都幾危險，之後行少少29，落返56，再之後因為唔想再上山，所以行24去378，378呢段路都係沿海，所以冇揀錯，係平路，最後行返56呢條大路去到尾就到松山。
以下係沿途風景
呢間早餐又係早餐即刻整，有和式西式揀，我揀西式，都幾好食。間酒店有個休息室，有部遊戲機，玩舊game，尋晚等洗衫玩左陣。呢間酒店值得推介。
今日又係天陰陰，中間仲要落左陣大雨
有啲霧環繞山，又幾靚
中間會見到呢啲活動中心咁嘅野，夏天應該可以玩水上活動
扮有feel咁影相
部電話影相一係太暗，一係太光，實際咁睇係好靚嘅。
上面張相嘅光版
一開頭沿河踩都係呢啲風景
一路都見到幾條沉下橋，但我一條都冇落去，因為太累，多少少路都唔想行，留返下次再黎。之後有啲路係單程路，所以要好小心。
踩踩下就見到個道路站，叫道の駅 よって西土佐，勁靚，又係同附近特別唔同。
有野食，有土產賣，我去買左支四萬十水
好多地方都貼著呢個麵包超人Logo
踩多陣就停左係一個道路站食lunch，叫道の駅 虹の森公園まつの
叫左個烏冬，驚唔夠飽，加多200羊要多個飯。
白飯加呢啲送飯
佢啲烏冬係綠色嘅，因為加左四國十產嘅青XXX，總之加底。食完之後就要踩今日最辛苦嘅路段，行31，因為真係好斜同好累，都係半推半踩咁上山，係全程唯一一段路要落車。
上完山之後，就當然係落山。中間有停左係道の駅 どんぶり館一陣，睇下有冇野好食，但冇睇啱。之後繼續踩，見到Lawson 即刻入去買雞扒補充體力。
最好食嘅Lawson雞。之後一段路都係普通小鎮街景，一時有小工廠，有農田，有店舖，有民居。
之後係入大洲市之前就見一個好靚嘅雲海。我係落斜行緊果時見到有個遍路嘅人停低影相先發覺。
真係好靚，但我影唔到最多雲嘅一刻
靚到用埋相機影
因為條唔冇行人路，唔可以突然停，好彩有個位畀車停，可以影到相
落完斜就會入到大洲市，離遠見到大洲城。下次再去四國，可以黎大洲參觀下。
Zoom 一Zoom近睇
因為睇Google Map，繼續行56要再上多次山，所以寧願行遠幾公里，經24去378行海邊。呢個決定應該係啱嘅，因為平路可以上返平均20KM/H。
又見到霧環繞山，但呢個時候已經開始天黑，但距離松山都有一段距離，所以之後一張相都冇影過。之後段路會經過下灘，出名話近海，同睇日落，但因為天都黑埋，所以睇唔到日落。其實我踩單車仲近海過個火車站，所以單車睇日落應該仲正。另外，378呢段路應該係單車路線黎，因為地方會見到你仲有幾多公里淨。最後不斷踩不斷踩，見著啲路牌寫著松山嘅距離愈黎愈近，由四十幾同二十幾，再到零，最後終於到啦。
今晚住間酒店對面就係松山城，方便我去參觀。
間房都OK舒服，但架單車要泊係樓下。
其實去到果時先八點左右，其實快快手都可以去到道後溫泉，但因為勁累，所以都係出去食個Dinner，就返房休息算，留返下次再黎。
亂咁入左間食麵，原來係食担担麵，叫一天張，都幾好食。間舖得老闆一個，煮野食，收碗，收錢，所有野都係佢一個做晒。
佢有啲套餐，我加多五百羊，有Beer同餃子，都幾抵。
慶祝踩得完全程
餃子味道就一般
個麵幾好食，好香花生味
食完都係唔夠飽，見左一間食雞湯拉麵，又入去食，仲叫左最豪華果個
份量好多，但我都食得晒，味道都還可以，我第一次食呢種拉麵。
食完就行返酒店休息啦，真係好累，但過左今日，之後都會輕鬆好多，係先苦後甜。
沒有留言:
張貼留言