四國單車環島 - 第五日
路線: 須崎去四萬十市
日期: 2018年12月05日
距離: 78.8公里
距離: 78.8公里
相機: Sony A5100 + Xperia XA2
今日行程短好多，當係用黎回復嘅一日。除左一開始要上一上山，之後都係平路，所以都好易踩。中間見到啲種柑果園，係個道路站食左個好好食嘅半熟鰹魚飯，見到個好靚嘅海邊公園，係好輕鬆嘅一日。
詳細路線
今日好簡單，記著一個number，淨係行國道56就會到四萬十市，除左前段要上七子峠係爬山之外，其他都係平路，唔難踩。
今次lunch 唔save，一次過
以下係沿途風景
酒店包早餐
須崎市市景，係一個小城市
佢會畀個coin你，食完畀返佢
啲野食都係一般
酒店正門
踩幾踩又見到太平洋
係行人路上面踩
真實係見到光柱，但部電話影得差
終於見到個牌
再前多少少就到頂
去到七子峠有個觀景台，回望返海邊，好靚，我應該就係係果邊上黎
都踩左幾遠先上到黎。
之後段路都係係河谷到踩，應該係四萬十川源頭果邊，唔會有好多上落。唔知點解一張相都冇影，但風景又係好靚，好有世外桃園feel，兩邊有農田，咁啱山上面又有霧，人又唔多，成個feel都好靚，好鐘意呢啲地方。最奇特係見到間好靚嘅西式蛋糕店，但附近係冇乜人，個建築風格同其他建築差好遠，諗唔明點解會係到。踩到咁上下就會一路落山，去到我今日食午餐嘅道路站。
好似拉麵店咁用部機叫野食。佢部機得日文，但有number可以對返旁圖牆啲圖，所以唔會唔識叫。
全部都係食鰹魚。之後search返，呢個道路站好似係出名食鰹魚，叫道の駅 なぶら土佐佐賀
買完等叫number
叫左有兩種調味嘅set
個餐最主要係得啲魚
有兩種口味，一隻有鹽，一隻原味，仲有兩種汁點，好好食。咁多餐最好食嘅鰹魚，總之叫兩個餐。
道路站個名
有個大停車場
可以睇佢點燒
一路加草一路燒
除左食堂，佢另一邊有賣嘅土產，柑同鰹魚食品，但因為冇位放，咩都買唔到
介紹呢頭附近有咩
有好大條鰹魚，應該真係出名食佢
四至十月可以睇鯨魚
走左去郵局寄post card
之後望返去佐賀呢個鎮仔，又係好靚
佐賀全景，入面好似有間食鰹魚名店，因為一路都有指示牌叫你去，叫黑潮一番館，但我食左就冇入去。
之後踩兩踩就會見到個大公園，叫土佐西南大規模公園(佐賀地区)，個公園好靚，係海邊，但又係冇乜人。
裹面有好多草被
就係國道旁邊，所以揸車都好易去
好靚呀
近鏡再睇睇
又有個觀景台，又走入去影相
又係海天一色
影唔到水平
又係如果有時間，可以係到放空hea 一日嘅地方
黎觀景台嘅路
有啲遊樂設施，唔係有架單車已經衝左去玩
個公園好大
個公園對出就有個火車站，所以唔揸車唔踩單車，都可以黎到
咁啱有架火車到站
之後又係一大段貼著海嘅路，又係望著個海黎踩
應該係出名鯨魚嘅地方
之後又有個公園，又係叫土佐西南大規模公園，但係係大方地区。有塊牌介紹附近有咩
呢個公園仲大過頭先果個，但冇咁靚
啲地方名好古怪，叫鞭
普普通通一條河都好靚
冬天好早就日落
平靜嘅河面反映天空
過埋條橋好快就到酒店
輕輕璧鬆就到左酒店，間房雖然唔大，又冇得沖涼，但有個展望浴場。
架單車放樓下
原本諗著行去商店街果邊睇下有咩食，但條街冇乜店有開，好靜
最後行返去酒店附近間物產館食晚餐
最後叫左個有豬扒有鰹魚嘅定食。鰹魚都係道路站好食啲。
回味lunch 嘅鰹魚
塊豬扒都唔差，但冇係去室戶岬食lunch間食堂塊豬扒咁大塊。
因為呢頭盛產柑，食完之後就係物產館買左啲柑汁
同埋買左袋柑黎啪，因為唔想太重，最後食左半袋。食完就休息，準備聽日最辛苦嘅一日，踩左差唔多一百六十公里。
沒有留言:
張貼留言