[是日踩單車] 四國單車環島 - 第一日

四國單車環島 - 第一日

路線: 香港去高松

日期: 2018年12月01日

相機: Sony A5100 + Xperia XA2

首先係到要多謝我女朋友畀我去，而且沿途幫我打氣同搵平路。繼上次去左石垣島踩單車之後，一路都再想去日本踩單車，咁啱轉完工有假要清，就請晒佢，加埋有九日假，話多唔多，話少唔少，最後選擇左去四國環島。(其實九日環四國係唔夠，因為冇左頭尾得七日)

為左用盡九日，第一日凌晨機係必需嘅，HKExpress 飛高松星期六冇機，所以決定坐Jetstar 去東京成田轉機，回程先坐HKExpress 係高松直接走。Jetstar 運單車要額外加錢，但百幾蚊，都合理。

原本兩點機，但delay 到三點幾，好驚上唔切下班機

Jetstar架飛機，好似係A320

訓下又玩下電話，就到日本成田，要坐巴士，因為趕時間，第一時間衝上巴士

但可能早又冇其他機，過關好快，而且我架單車唔會係行李帶出，有人另外推出黎，所以好快就拎到，由落機到check in 內陸機，成個過程用左40分鐘左右，仲有成個幾鐘淨，勁快。

Check in 完行去Terminal，Jetstar內陸機有自己一個terminal(應該係)

賣得獎嘅水

買左支試下，都係水

去高松嘅係A321，大架啲，而家都好full

坐多個幾鐘就到高松啦

架單車都係唔係行李帶出，另外有人推出黎，所以又係好快拎到

係機場買車飛去高松JR站，架巴士有行李箱，放到架單車

今次住右手邊呢間クレメントイン高松，成間酒店都係三角形，好特別，而且係2018年10月新開，啲野好新。我揀佢除左因為新，佢好近機場巴士站總站，行幾步就到酒店，唔洗拖著架單車行好遠，又唔洗驚落錯車。因為我有個單車袋要Keep 八日，要搵位寄存，所以去之前Book左頭尾兩日都住佢，去之前都用Email問佢可唔可以幫我Keep咁耐，好彩佢地都幫到我呢個大忙。

返到酒店即刻砌返架單車先，一陣有咩事都即刻可以拎去單車店搵人整。砌完之後，因為未食lunch，好肚餓，就出去搵野食。酒店係海邊，好大風下。

去左食烏冬

之後行下商店街，幫女朋友買下化妝品。由酒店行去要十分鐘左右。

有聖誕樹

 商店街

食完就返返酒店訓陣

一個人黎講，間房都幾大，放完個單車袋仲有位淨

張床好大

設備好新，好乾淨

因為冬天，四五點就日落，好快天黑

為左輕同方便，買左Tailfin呢個牌子嘅單車行李架。雖然唔平，但好值得，好易裝，又實淨，七日日曬雨淋都冇任何問題，最重要係裝到落road bike。

夜晚再出去睇下有咩食，有介紹HKExpress飛香港

最後又係超市買特價魚生飯，二百幾羊一盒，真係好平

買完就返酒店開餐。食完去左酒店個大浴場沖涼，都幾正。房裹面啲電視有Youtube，可以睇到港台，蘋果動。Hea多陣就休息，準備聽日第一日去德島嘅行程